བོད་གཞུང་ནང་སྲིད་ལས་ཁུངས་ཀྱི་མཉམ་འབྲེལ་རོགས་སྐྱོར་སྡེ་ཚན་གྱི་འཕྲལ་ཕུགས་ཀྱི་དགོས་དམིགས་དང་ལས་དོན་བྱེད་ཕྱོགས་ཀྱི་འཆར་གཞི།

༄༅། ། བཙན་བྱོལ་བོད་མིའི་གཞིས་སྒར་ཁག་གི་མཉམ་འབྲེལ་དང་འབྲེལ་བའི་ལས་དོན་གྱི་དམིགས་ཡུལ་ཁག་ནི། ཀ མ་འོངས་པའི་བོད་ནི་ྋགོང་ས་ྋསྐྱབས་མགོན་ཆེན་པོའི་བཞེད་དགོངས་ལྟར་འཚེ་བ་མེད་པའི་བསྟི་གནས་དང༌། ཁོར་ཡུག་སྲུང་སྐྱོབ་ཀྱི་རྭ་བ་ཞིག་ཏུ་བསྐྲུན་རྒྱུ་ཡིན་སྟབས། མ་འོངས་བོད་ཀྱི་དཔལ་འབྱོར་གྱི་ལམ་སྲོལ་ཡང་དེ་དང་མཐུན་པར་འཚེ་བ་མེད་པ་དང༌། ཁོར་ཡུག་ལ་མི་གནོད་པ། མ་རྩའི་རིང་ལུགས་དང་དམར་པོའི་རིང་ལུགས་གཉིས་ཀའི་མཐའ་ལས་འདས་པའི་དབུ་མའི་ལམ། བག་མེད་ལོངས་སྤྱོད་དང་གོ་ལ་གཅིག་བསྒྱུར་གྱི་སྲོལ་ངན་ལ་གདོང་ལེན་དང་ཁ་གཏད་ཐུབ་ངེས་ཀྱི་སྲོལ་རྒྱུན་དང་མཐུན་པའི་གཞན་བརྟེན་མ་དགོས་པར་རང་མཁོ་ལྡེང་ངེས་ཀྱི་ཐོན་སྐྱེད་ཡོད་པ་ཞིག་དགོས་པ་དང༌། དེའི་ཆེད་མཉམ་འབྲེལ་དང་མཉམ་ལས་རོགས་རེས་ཀྱི་ལམ་སྲོལ་ཞིག་ངེས་པར་འཛུགས་དགོས། དེར་བརྟེན་ད་ལྟ་བཙན་བྱོལ་གྱི་གནས་སྐབས་སུའང་བོད་མི་གཞིས་སྒར་སོ་སོའི་ད་ཡོད་མཉམ་འབྲེལ་གྱི་ལས་འགུལ་འདི་དག་ལ་ལེགས་བཅོས་དང་ཡར་རྒྱས་བཏང་སྟེ་འབྱུང་འགྱུར་བོད་མི་གཞིས་བྱེས་མཉམ་འཛོམས་བྱུང་མཚམས་བཙན་བྱོལ་རིང་གི་ཉམས་མྱོང་བཟང་པོ་རྣམས་འབྱུང་འགྱུར་བོད་གསར་པའི་འཛུགས་སྐྲུན་ལ་ཕན་ཐོགས་ཡོད་ངེས་ཤིག་བྱ་རྒྱུ།

ཁ དེའི་སླད་བཙན་བྱོལ་མང་ཚོགས་ལ་མཉམ་འབྲེལ་གྱི་དམིགས་ཡུལ་དང་ལྟ་གྲུབ་ཀྱི་གོ་རྟོགས་གོང་འཕེལ་གཏོང་ཆེད་ཟབ་སྦྱོང་དང་སློབ་སྤེལ་གྱི་ལམ་ནས་མཉམ་འབྲེལ་གྱི་ལས་དོན་མཐའ་དག་ཤས་བདག་མང་ཚོགས་ཀྱི་ཁེ་ཕན་ཁོ་ནའི་ཆེད་དུ་ཡིན་པའི་ཡིད་ཆེས་ངེས་རྙེད་ཐུབ་པ་ཞིག་བཟོ་རྒྱུ་དང༌། དེ་ལ་བརྟེན་ནས་མཉམ་འབྲེལ་གྱི་འཛིན་སྐྱོང་གིས་མཚོན་པའི་ལས་དོན་རྣམས་ཤས་བདག་མང་ཚོགས་ཀྱིས་ཁུར་འགན་ཆ་ཚང་ལེན་ཐུབ་པ་ཞིག་ཡོང་ཐབས་བྱ་རྒྱུ།

ག བཙན་བྱོལ་བོད་མིའི་བཅའ་ཁྲིམས་དོན་ཚན་ ༩༣ པའི་ནང་གསེས་དོན་ཚན་ཁག་གི་དགོངས་དོན་བཞིན་མཉམ་འབྲེལ་ཁག་གི་ཐོན་སྐྱེད་དང་ཁེ་འབབ་ཇི་ཡོད་ཤས་བདག་མི་མང་གི་དགོས་མཁོ་ལ་ཕན་ཐབས་སུ་འཕྲལ་འཕྲལ་བེད་སྤྱོད་དགོས་པ་དང༌། ཡོང་འབབ་འདུ་འགོད་བྱ་ཕྱོགས་ཀྱང་ཡུལ་ཁྲིམས་དང་མཐུན་ཞིང་ལོག་འཚོས་མ་བསླད་པ་ཞིག་ཡོང་ཐབས་བྱ་རྒྱུ།

ང ད་ཡོད་མཉམ་འབྲེལ་ཁག་གི་རྩིས་ཆད་དང་ཡོང་བསྡད་ཇི་ཡོད་དུས་ཚོད་ངེས་ཅན་གྱི་ནང་གཙང་དག་ཐུབ་པ་བཟོ་རྒྱུ་དང༌། འབྱུང་འགྱུར་རྩིས་ལོ་རེ་རེའི་ནང་ཡོང་བསྡད་གཙང་སེལ་བཟོ་དགོས་པ་མ་ཟད། བུན་ནག་རིགས་ཡང་ཡང་མི་ཡོང་བའི་འབད་རྩོལ་བྱ་རྒྱུ་དང༌། རྩིས་ཞིབ་ཀྱི་སྐྱོན་འདོན་ཁག་གི་གསལ་བཤད་ལན་འདེབས་ཁུངས་འཕེར་རྩིས་ལོ་སོ་སོའི་ནང་ཟིན་དགོས་པའི་ལམ་སྲོལ་བཟོ་རྒྱུ།

ཅ དུས་ཚོད་ངེས་ཅན་གྱི་ནང་མཉམ་འབྲེལ་སོ་སོའི་སྒྲིག་གཞི་ལ་བསྐྱར་བཅོས་དགོས་རིགས་ཁྲིམས་ལུགས་ལྟར་བསྐྱར་བཅོས་བྱས་ཏེ་འབྱུང་འགྱུར་མཉམ་འབྲེལ་ཚོགས་གཙོ་དང༌། མཉམ་འབྲེལ་དྲུང་ཆེས་མཚོན་མཉམ་འབྲེལ་གྱི་ལས་བྱེད་ཁག་གཞུང་ཞབས་ལ་བརྟེན་ལྟོས་མ་དགོས་པར། མཉམ་འབྲེལ་སོ་སོའི་རང་ཁུངས་ནས་འོས་འདེམས་དང་བསྐོ་གཞག་ཐུབ་པ་ཡོང་རྒྱུའི་ངེས་ཅན་གྱི་འཆར་གཞིའི་ཐོག་འབད་རྩོལ་བྱ་རྒྱུ།

ཆ མཉམ་འབྲེལ་གྱི་ལས་བྱེད་རྣམས་མཉམ་འབྲེལ་གྱི་ལྟ་གྲུབ་དང༌། ས་གནས་སོ་སོའི་མཉམ་འབྲེལ་གྱི་ཁྲིམས་ལུགས་ཀྱི་ཐོག་དམིགས་བསལ་སྦྱོང་བདར་དང་ཤེས་ཚད་ཡོད་པ་དགོས་པའི་ཆ་རྐྱེན་དང༌། ལས་བྱེད་རྣམས་ཀྱི་ཁེ་ཕན་དང་སྒྲིག་འཛུགས་ཚད་ལྡན་ཡོང་སླད་མཉམ་འབྲེལ་ཀུན་ལ་ཁྱབ་པའི་ལས་བྱེད་ཀྱི་སྒྲིག་གྲལ་དང༌། འདེམས་བསྐཱུའི་སྒྲིག་གཞི་གསར་བསྐྲུན་ཐུབ་མིན་ཉམས་ཞིབ་བྱ་རྒྱུ།

ཇ བོད་མིའི་མཉམ་འབྲེལ་ཡོངས་ཀྱི་ཉམས་མྱོང་དང་ཁེ་ཕན་རྣམས་ཕན་ཚུན་བརྗེ་ལེན་ཡོང་ཐབས་དང༌། ལྷག་པར་ཐག་རིང་མཐའ་མཚམས་སུ་ཡོད་པའི་མཉམ་འབྲེལ་ཁག་གི་ཐོན་སྐྱེད་རྣམས་སྐབས་འཕྲལ་ཁྲོམ་རྭར་འགྲེམས་ཚོང་ཐུབ་ཐབས་ཀྱི་ལས་དོན་ཚགས་ཚུད་ཡོང་སླད་མཉམ་འབྲེལ་ཚང་མའི་སྤྱི་མཐུན་གྱི་སྒྲིག་འཛུགས་Federation of Cooperative Society ཤིག་གསར་འཛུགས་ཀྱིས་ཐོན་སྐྱེད་ཉོ་ཚོང་སྤྱི་དང༌། ཁྱད་པར་ཕྱི་ཚོང་ནང་འགྲེམས་ཀྱི་ཆ་རྐྱེན་ཚད་ལྡན་སྒྲུབ་ཐབས་བྱ་རྒྱུ་བཅས་ཡིན།

ལས་འཆར།

ཀ ད་ལྟའི་གཞིས་སྒར་ཁག་གི་མཉམ་འབྲེལ་སོ་སོའི་དངོས་ཡོད་གནས་བབས་ཀྱི་སྙན་ཐོ་ཚད་ལྡན་ཞིག་མཁོ་བསྡུ་བྱེད་སླད་གནས་བབས་སྙན་ཐོ་འགེངས་ཤོག་གཏན་འབེབས་ཐོག་སྙན་ཐོ་བསྡུ་རུབ་བྱ་རྒྱུ།

ཁ སྙན་ཐོ་འགེངས་ཤོག་འབྱོར་མཚམས་ཕྱོགས་བསྡོམས་དང་ཉམས་ཞིབ་ཀྱི་ཐོག་ནས་སྤྱི་ཡོངས་གནས་བབས་དང༌། འབྱུང་འགྱུར་བྱེད་འཆར་གྱི་རྒྱབ་གཉེར་བཅས་འབུལ་རྒྱུ།

ག ས་གནས་ཁ་ཤས་ལ་བསྐྱར་ཞིབ་གཏིང་ཟབ་སླད་ལྟ་སྐོར་ཆེད་མི་འགྲོ་ཆེད་གཏོང་བྱ་རྒྱུ།

ང དངོས་ཡོད་གནས་བབས་ཀྱི་སྙན་ཐོ་དང༌། དེ་འབྲེལ་གྱི་རྒྱབ་གཉེར་ཁག་གཞིར་བཟུང་མཉམ་འབྲེལ་སོ་སོའི་ད་ཡོད་ཀྱི་དཀའ་ངལ་སེལ་ཐབས་དང༌། འབྱུང་འགྱུར་ལས་དོན་ཚགས་ཚུད་ཕུགས་འཕེར་ཡོང་ཐབས་ཀྱི་སྦྱོང་བདར་དང༌། མི་འགྲོ་དང་དཔལ་འབྱོར་གྱི་མཐུན་འགྱུར་སྒྲུབ་ཐབས་བཅས་ཀྱི་ལོ་ལྔའི་འཆར་གཞིའི་དུས་ཚོད་རེའུ་མིག་དང་བཅས་པ་བཀོད་དེ་ལག་བསྟར་བྱ་རྒྱུ་བཅས་གཏན་འབེབས་གནང་འདུག ད་ཡོད་གནས་ཚུལ་སྙན་ཐཱུའི་འགེངས་ཤོག་དང་ཕྱི་ལོ་ ༢༠༠༢། ༢༠༠༣ གྱི་ལས་འཆར་དུས་ཚོད་རེའུ་མིག་བཅས་ཟུར་གསལ་གཏན་འབེབས་གནང་ཡོད།