ཨ་རི་ནས་ཕེབས་པའི་གཙུག་ལག་སློབ་གཉེར་ཁང་ཞིག་གི་སློབ་མར་གསུང་བཤད་གནང་བ།

ཕྱི་ལོ་ ༢༠༡༥ ཟླ་ ༡ ཚེས་ ༡༩ ཉིན་ཨ་རིའི་ཕྷོ་རོ་སི་ཊི་བྷུར་གྷ་གཙུག་ལག་སློབ་གཉེར་ཁང་ (Frostburg State University) གི་འགོ་ཁྲིད་དང་ཉམས་མྱོང་སྦྱོང་བརྡར་གྱི་འགན་འཛིན་སྐུ་ཞབས་དྷ་གྷ་ལཱ་སི་བྷིར་(Dauglas Bear) ལགས་དང་མཁས་དབང་ཝི་ཀི་ཊོ་རཱ་གྷར་ཧར་ཊི་ (Victoria Gearhart) གཉིས་ཀྱིས་སྣེ་ཁྲིད་པའི་གཙུག་ལག་སློབ་གཉེར་ཁང་དེའི་སློབ་ཕྲུག་ ༦ དང་། གློག་བརྙན་སྒྲིག་བཟོ་ཆེད་མཁས་པ་ ༡ བཅས་ཁྱོན་མི་གྲངས་ ༩ ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་དང་རིག་གཞུང་བརྗེ་རེས་ཆེད་དྷ་རམ་ས་ལར་འབྱོར།
ཕྱི་ཚེས་ ༢༢ ཉིན་མཁས་དབང་ཟམ་གདོང་རིན་པོ་ཆེ་མཆོག་གིས་དྷ་ས་ཐེག་ཆེན་ཆོས་གླིང་གཙུག་ལག་ཁང་གི་གཤམ་འོག་ཏུ་ཡོད་པའི་ལྷའི་ཞི་བའི་ཚལ་(Ahimsa house) གྱི་ཚོགས་ཁང་ནང་དགེ་སློབ་རྣམས་ལ་བདེན་བཞིའི་རྣམ་གཞག་སོགས་ནང་ཆོས་དང་འཚེ་བ་མེད་པའི་བལྟ་གྲུབ་སྐོར་ངོ་སྤྲོད་གསུང་བཤད་དང་། གཞན་ཡང་གཞི་རིམ་སྒོམ་གྱི་འགྲོ་སྟངས་དང་ཤེས་ཡོན་སློབ་གསོ་བཅས་ཀྱི་སྐོར་ངོ་སྤྲོད་གསུང་བཤད་དང་དྲི་བ་དྲིས་ལན་བཅས་གནང་ཡོད་པ་རེད།